دعا وں کا حصا ر

میں اسپتال  کی راہداری میں  موجود تھا کہ اتنے میں  کانپتے جسم اور   لرزتے ہاتھوں کے ساتھ ایک انتہائی ضعیف  شخص  میرے قریب آیا  اور  مجھ  سے کہنے لگا  "بیٹا حامد میر کی طبیعت اب  کیسی ہے ؟ "  یہ پوچھتے  ہوئے بھی اسکی آواز کپکپا رہی تھی اور ہونٹ لرز رہے تھے ۔۔۔۔۔۔ میں نے انہیں تسلی  دی اور  میر صاحب کی خیریت کا بتایا  کہ انکی طبیعت اب بہتر ہے ۔۔۔۔۔ بعدا ازاں  ان سے تعارف ہوا    تو کہنے لگے کہ بیٹا میں ایک عام سا انسان ہوں ، بس میر صاحب کی جرات اور انکی سچائی  سے پیار کرتا ہوں ۔۔۔ رات ساری رات مصلے پر سجدے میں سر رکھ  کر   انکی زندگی کی دعائیں  مانگتا رہا ، اور اب رہا نہ گیا  تو دل کے ھاتھوں مجبور  ہو کے اسپتال چلا آیا ۔۔۔۔ یہ کہہ کر وہ مڑے اور  جانے لگے ۔۔ میں  نےایک بار پھر انہیں تسلی دی ۔۔۔۔جاتے جاتے کہنے لگے بیٹا   بس دل کو سکون مل گیا ۔  اللہ پاک انہیں اپنی  حفظ و امان میں  رکھے ۔۔۔یہ کہتے ہی وہ نحیف شخص  میری نظروں سے اوجھل ہو گیا ۔۔۔۔۔

سچ اور  سچائی  سے محبت  کرنے والے  اس بوڑھے کے جانے کے بعد۔۔۔۔  میں اسپتال کے صوفے پر ایک  جانب بیٹھ گیا ۔  ۔۔۔۔تو مجھے  وہ  اسی سالہ  اماں یاد آگئیں ۔۔۔جو ہمیشہ مجھے اپنا بیٹا کہتی ہیں ۔۔۔اکثر مجھے  وہ  نفلی  روزے رکھے ہوئے   ۔۔ اور  رب کے حضور  سجدے میں  ملتیں ۔ ۔۔۔۔ باتوں باتوں میں بتاتی کہ بیٹا  حامد میر کی زندگی  اور حفاظت   کیلئے  دعا کرتی ہوں ۔۔اللہ اسکو  لمبی زندگی  عطا فرمائے ۔۔۔ یہ ضعیف اماں  جس سے  چلا بھی نہیں جاتا ۔۔۔جو کسی کا ہاتھ  پکڑ کر گھر کی دہلیز پار کرتی ہیں ۔۔۔۔یہ اماں  مسنگ پرسنز  کے کیمپ میں شرکت کیلئے  اسلام آباد پہنچ گئیں ۔۔۔ اور جب  حامد  صاحب  نے مسنگ پرسنز پر پروگرام   کئے ،  تو  وہ اسمیں  بھی شریک ہوئیں ۔۔۔۔اس  اماں کے دو  جوان  بیٹوں کو غائب  ہوئے  کئی  ماہ  ہو چکے تھے ۔۔۔۔اور  بالآخر   چھ ماہ کی کوششوں   کے بعد  انہیں بے گناہ  اور کلیئر کرکے چھوڑ دیا گیا ۔۔۔۔۔۔۔ لیکن حامد  میر  اس بوڑھی  اماں کی دعاوں  میں ہمیشہ  رہتا  ہے ۔۔۔۔ایک ھفتہ  پہلے  اس بوڑھی  اماں  سے  ملنے  انکے گھر گیا  دعا  کی درخواست  کی ۔۔۔۔ تو کہنے لگیں ۔۔۔۔ بیٹا  کہنے کی ضرورت  نہیں تم اور  حامد میر ہمیشہ  میری دعاوں  میں رہتے  ہو ۔۔۔۔۔

مجھے  یاد آیا  کہ  وہ اکتوبر 2005 کی  ایک اداس شام تھی ۔۔۔۔۔پاکستان کی تاریخ  کا خطرناک  زلزلہ آئے   ہفتہ بھر ہونے کو تھا ۔۔۔اور مجھ  پر  جیو کیطرف  سے مظفر آباد  بیس کیمپ کی ذمہ داری تھی ۔۔۔۔۔کہ حامد میر  صاحب مظفر آباد  سے  پروگرام کرنے آئے ۔۔۔۔ اس دن مجھ پر حا مد میر  صاحب کی شخصیت   کے کچھ اور پہلو  بھی  آشکار  ہوئے ۔۔۔ میں  تو اگرچہ ایک بہت ہی معمولی سا رپورٹر تھا ۔۔۔۔لیکن میر صاحب نے کئی ایک بریکنگ  نیوز مجھے  دیکر   مجھ سے  بریک کروائیں ۔۔۔اور اس طرح   ایک چھوٹے رپورٹر  کی حوصلہ افزائی  کی ۔۔۔اور مختلف پہلووں پر  رپورٹس   بنانے  کیلئے   کئی ایک ٹپس  دیں ۔۔۔جو زندگی بھر رپورٹنگ  کے دوران  میری رہنمائی کرتی رہیں ۔۔۔۔ جن میں سب سے بڑی بات ۔۔۔ سچ بات کو ڈٹ کر  کہنا اور بے خوف و خطر ہو کر رپورٹنگ کرنا  سب سے اہم تھی ۔۔۔۔۔

آج ہاسپیٹل  کی اس لابی میں بیٹھ  کر میں سوچنے لگا  کہ   میر صاحب  نے جس بات  کا درس 2005 میں  مجھے دیا ۔۔آج  خود اسی  سچ کی وجہ سے ہسپتال پہنچ گئے ہیں ۔۔۔۔۔ خبر کی تلاش ۔۔۔ جستجو ۔۔۔۔اور طلب  کی یہ صفات  میں  نے  میر صاحب سے 2005 کے زلزلے میں سیکھیں ۔۔۔۔اور تلاش کا یہ سفر ہی ہے جو انسان کو متحرک  رکھتا ہے ۔۔۔اور  میر صاحب ہمیشہ  متحرک ہی  رہے ۔۔۔۔۔سچ کی تلاش کا یہ سفر  آج بھی جاری ہے ۔۔۔اور قابل داد ہیں وہ لوگ  جو  اس  سفر میں  اپنی انگلیوں کو قلم  کرکے اپنی زندگی کو دھیرے دھیرے  سلو پوائزن کی طرح کسی مقصد  کیلئے  وار  دیتے    ہیں ۔۔۔۔۔اور سچ کو جاننے  اور پہچاننے   کے اس  سفر میں  شمع کی مانند ہم جیسوں  کو تاریک  راہوں  میں اجالوں کا پتہ دیتے  ہیں ۔  میر صاحب جیسے  لوگ آج کے گئے گزرے زمانے میں  صحافت کے آسمان پر چمکتے ہوئے ستارے ہیں ۔۔۔۔جن کی کرنوں سے  آنے والوں  نے اپنے آپ کو منور کرنا ہے ۔۔۔یا شاید آج کے اس نفسا نفسی کے دور  میں  حامد میر جیسے لوگ  اس زمین  کا نمک ہیں ۔۔۔جنکی وجہ سے صحافت  کے ذائقے  کو  بقا اور دوام حاصل ہے ۔۔۔شاعر نے شاید ایسے ہی سچے اور کھرے لوگوں کیلئے کہا ہے کہ

شام غم  ، ظلمت شب ، صبح الم بولتے ہیں

جب کوئی اور نہیں  بولتا ، ہم بولتے ہیں

بول جب بند تھے سب کے تو ہم ہی بولتے تھے

بولتا  کوئی نہیں آج بھی،   ہم ہی  بولتے  ہیں

دیدہ ور ،اہل صفا ،  اہل جنوں  چپ ہی رہے

سچ کو لکھتے ، جو ہوئے ہاتھ قلم   بولتے  ہیں

 جب تک سچ  بولنے کا یہ عمل جاری ہے ۔۔۔جاننے اور  پہچاننے کا سفر جاری رہے گا ۔۔۔۔۔اور لاکھوں  لوگوں کی دعائیں  سچ بولنے والوں  کواپنی حفاظت  کے حصار میں رکھیں گی ۔۔۔

بھولے سائیں

میں نے اس سے پوچھا

بھائی! پیپلز پارٹی نے ایسے بوڑھے کو وزیر اعلیٰ  کیوں بنایا ہے جو بھنگ کا کولر بھی ہر وقت گاڑی میں رکھتا ہے ؟

اس نے ایک زوردار قہقہ لگایا ۔۔۔۔۔اور کہا کہ سائیں اتنا بڑا صحافی ہو کے بھی ۔۔۔۔بڑے بھولے ہو یار !

پھر اس نے دائیں بائیں دیکھا اور کہا سائیں کان  ادھر لاو ۔۔۔۔۔۔۔۔۔۔۔۔۔۔۔۔۔

اور پھر میرے دونوں کانوں پر ھاتھ رکھ کر اس نے بتایا

" با با سائیں ۔۔۔۔۔۔۔یہ پیپلز پارٹی کی بڑی پرانی اسٹرٹجی ہے ، کہ وزیر اعلیٰ ہمیشہ  ایسے شخص کو بناو ۔ جو قبر میں پاوں لٹکائے بیٹھا  ہو ۔۔۔۔ساری فائلوں پہ اسی کے دستخط کرواو ۔۔۔۔۔سارا کرپشن اسکی وفات کے ساتھ ہی قبر میں  دفن ہو جائیگا ۔۔۔۔پھر کرتے رہو احتساب۔۔۔۔۔۔۔۔۔۔با با سائیں  ۔۔دیکھیں نا  پیپلز پارٹی کی پہلی حکومت میں سارے کام عبد الللہ شاہ کے نام سے ہوئے ، اور اسکے جانے کے ساتھ ہی کرپشن کے سارے کیس بھی قبر میں  بند ہو گئے ۔۔۔اب قبر میں جا کے کر لو احتساب ۔۔۔۔۔۔"

بابا سائیں  بات کو سمجھو ۔۔۔۔۔پچھلے پانچ سال میں ایک صوبے کا وزیر اعلیٰ  چرسی اور ایک کا بھنگی تھا ۔۔۔۔۔اب اس مرتبہ تو ایک ہی صوبے میں حکومت ہےنا  ۔۔۔ تو بابا سائیں بس بھنگی کو دوبارہ بنا دیا ۔۔۔

اس نے میرے کان سے  منہ ہٹایا ۔۔۔۔اور بولا ۔۔۔۔بابا سائیں آئی بات سمجھ میں ۔۔۔۔۔

میں نے پوچھا ۔۔۔یار ۔۔۔۔۔یہ تو بتا  وکہ یہ گندم کی تقسیم کے معاملے میں بد انتظامی کی کیا کہانی ہے ؟

اس نے پھر ایک زوردار قہقہہ لگایا اور بولا ۔۔۔

بہت بھولے ہو بابا سائیں ۔۔۔۔۔۔۔۔۔۔۔بہت بھولے ۔۔۔۔۔۔۔۔۔۔۔۔۔۔۔۔۔۔۔

وہ میرے کان کے قریب منہ لایا ۔۔۔۔۔۔۔۔۔دائیں بائیں دیکھا ۔۔۔۔اور دونوں ھاتھوں سے میرے کان کے قریب ایک ہالہ سا بنا کے بولا ۔۔

" بابا  سائیں ۔۔۔۔بد انتظامی کیسی ۔۔۔۔۔۔ساری گندم تو مارکیٹ  میں بیچ دی گئی ۔۔۔۔۔۔۔۔۔۔۔۔۔۔۔۔۔۔"

میں نے کہا کہ یار یہ کیسے ؟

اس نے پھر ایک زوردار قہقہ لگایا اور بولا  یار ۔۔۔۔بڑے بھولےصحافی ہو ۔۔۔۔

سنو ۔۔۔۔بابا پیپلز پارٹی  کی اسٹریٹجی ہے کہ کرپشن کرنے کیلئے  ۔۔۔۔۔کرپشن کی چین  بنادو ۔۔۔۔

میں نے پوچھا وہ کیسے ؟

کہنے لگا ۔۔۔۔بھولے سائیں وہ ایسے ۔۔۔۔کہ اوپر سے نیچے تک سارے لوگ اپنے خاندان کے لگاو ۔۔۔۔وزیر بھی ۔۔۔۔ ڈپٹی کمشنر بھی اپنا ۔۔۔۔۔مختار کار بھی اپنا ۔۔۔۔۔۔پٹواری بھی اپنا۔۔۔۔۔۔ٹھیکیدار بھی اپنا ۔۔۔۔۔۔پھر  کاغذات  میں گندم کو  تقسیم  ہوتا  ہوا  دکھاو  اور سب سے دستخط  کروا لو۔۔۔۔اور رپورٹ   جمع کروا دو ۔۔۔۔نوکری جانے کے ڈر سے کوئی بھی نہیں بولے گا ۔۔۔اب دیکھو نا  بھولے صحافی

رلیف کا وزیر بھی مخدوم خاندان کا ۔۔۔۔تھر کا ڈی سی  بھی اسی خاندان کا ۔۔۔۔نیچے کا چھو ٹے  سے چھوٹا عملہ بھی اسی خاندان کا ۔۔۔اور تقسیم کرنے اور گندم پہنچانے والے ٹھیکیدار بھی اسی خاندان کے رکھے ہوئے ۔۔۔۔اب کوئی کرپشن کے کھرے نکال کے تو دکھائے ۔۔۔۔۔۔۔

بھولے صحافی یہ ہوتی ہے اسٹریٹجی ۔۔۔۔۔"

میں نے آنکھیں پھاڑتے ہوئے کہا ۔۔۔۔مان گئے بابا سائیں ۔۔۔۔مان گئے ۔۔۔۔پیپلز پارٹی سے کرپشن میں بڑا  استاد کوئی نہیں ۔ بابا سائیں ۔۔۔۔۔۔۔۔۔۔۔۔۔۔۔۔۔۔۔

بھوری آنکھوں والے

            

کل رات کیا دیکھتا ہوں  ۔۔۔ میں ایک پہاڑی علاقے میں  ہوں ۔۔۔۔۔ میرے  ارد گرد لٹے پٹے لوگ ہیں ، جن کے تن پہ ڈھانپنے کیلئے  پورے کپڑے  بھی مشکل سے  میسر ہیں ۔۔۔۔ میرے سامنے بھوری آنکھوں والے بچے ہیں ۔ جنکی  چمکتی آنکھوں میں چمک کی جگہ اب خوف کے سائے لہرا رہے ہیں ۔  وہ میرے   وڈیو  کیمرے اور اسکے ٹرائی پوڈ  کو  کوئی گن  سمجھ  رہے ہیں ۔۔۔۔سہمے  ہوئے   ۔۔۔۔۔بات کرنے  سےگریزاں ۔۔۔جیسے روٹھے ہوئے ہوں ۔۔۔۔دیکھتا ہوں  کہ شاید میں کسی نیوز کوریج کیلئے  اس پہاڑی علاقے  میں پہنچا ہوں ۔۔۔ جہاں لوگ ۔۔۔۔ کسی آپریشن کی وجہ سے اپنا گھربار چھوڑ کر اب  خیمہ بستیوں  کی زندگی گذارنے پر مجبور ہیں ۔۔۔

میں اپنا  کیمرہ  سیٹ  کرتا ہوں  ۔۔۔ مائیک کی کیبل  درست کرتا ہوں ۔  میرا کیمرہ مین  ساونڈ چیک کرتا ہے ۔ آواز صاف اور کلیئر ہے ۔  میں  اب   انکے نوحے بیچنے کیلئے  کسی ایسے فرد کا متلاشی ہوں ۔ جسکا   مال  و اسباب   بمباری  میں تباہ ہو چکا ہو ۔  جو اذیت  کا مارا ہو۔۔۔۔۔ خاندان کی کئی زندگیاں بھی لٹا چکا ہو ۔۔۔ جسکی داستان  سن کر لوگ  رو پڑیں ۔۔ کم از کم ٹی وی  سیٹ کے سامنے بیٹھنے والوں کے تو آنسووں نکل ہی پڑیں ۔۔۔۔ اور اسٹوری ہٹ کر جائے ۔۔۔ یہ سوچ کر  میں ایک  ایسے شخص کی طرف بڑھتا ہوں   جو  باقی لوگوں سے بہت الگ تھلگ  کھڑا ہے ۔  اور  بظاہر   ٹی  وی  کیمرے سے  بھی بے پرواہ نظر  آرہا ہے ۔  کپڑے  بھی میلے ہیں ۔۔۔ اور  سر پر باندھے عمامے  سے  باہر جھانکتے ا سکے بال بھی  بتا رہےہیں کہ شاید  کئی دن سے نہایا بھی نہیں ہے ۔۔۔۔  یہ شخص  مجھے اپنے مطلب کا لگا ۔۔۔۔، اور میں  اسکی    جانب  بڑھا  اور  اپنے چینل کا مائیک  اسکی جانب بڑھایا ۔۔۔۔۔  لیکن  یہ  کیا  اس نے تو   منہ دوسری طرف  پھیر لیا ۔۔۔۔ میں سوچنے لگا کہ شاید   اس نے مجھے دیکھا ہی  نہیں   ۔  

میں کہتا ہوں۔۔۔۔۔ بھائی صاحب  کیا نام ہے آپکا ۔۔۔؟

اس نے ایک بھر پور   نظر  مجھ  پہ ڈالی ۔۔۔۔۔۔اس ایک نظر  میں  میرے لئے ۔۔۔۔غصہ  ۔۔۔ نفرت ۔۔۔۔۔اور وہ سب کچھ  تھا  جو    محسوس کرنے کے  بعد کچھ  پوچھنے کی جرات   نہیں  ہوتی ۔۔۔میں نے سوچا  شاید دکھوں کا مارا ہے ۔۔۔ بات کرنے  سے  کترا  رہا ہے ۔۔۔۔ چلو  پہلے کسی  بچے کا انٹرویو  کرتے ہیں ۔ اس  سے  پوچھتے ہیں ، کہ تم  اپنی ماں  کے بغیر کیسا محسوس کر رہے ہو ؟    ماں  کو   بموں  کی بارش میں  کھونے کے بعد  کیا اب  رات  کو نیند آتی ہے ؟   جب   جیٹ طیاروں سے  بم برس رہے تھے   تو آپ کی ماں  کیا کر ہی تھی؟   اب جب آپ  کو بھوک لگتی ہے   تو  آپ کھانا کس سے مانگتے ہو؟۔۔۔جس  بم سے  تمہارا گھر جلا ... اور جل کر راکھ کے ڈھیر  میں  تبدیل  ہوا ۔۔۔۔اس میں تمہارا جو بھائی  جھلس گیا ۔۔۔اور جسکو گدھے  پر ڈال کر  تم  لوگ اسپتال  کی آس دل میں سجائے یہاں آئے تھے  ۔  تکلیف کی شدت  سے جسکی آہیں  اور سسکیاں  سن کر آپ  رو رہے تھے ۔ اور جس  نے راستے میں ہی دم توڑ دیا ۔۔کیا وہ اب آپ کو یاد آتا ہے ؟   یہ اور اس جیسے بہت  سے سولا ت سوچتے ہوئے  میں  اس بھوری آنکھ  والے بچے کی جانب  بڑھا ۔۔۔ اور  مجھے یقین تھا ۔ کہ اتنے جذباتی سوال سن کر  بچہ  رو ہی پڑے  گا ۔۔۔ اور پھر اسکی بھوری آنکھوں  سے ۔۔۔۔۔اسکے  گلابی گالوں  پر بہنے والے  آنسوں۔۔۔   اسٹوری میں  جان ڈال دینگے ۔۔۔۔ مگر  یہ کیا ۔۔۔ بھوری  آنکھیں   تو۔۔۔۔ لال  انگارہ  ہو رہی ہیں ۔۔۔۔ حکومت  وقت نے انکو خیمے دئے ہیں ، ۔۔۔۔کئی   ملکی این جی اوز ۔۔۔۔۔دن رات انکے لئے ۔۔۔اس خیمہ بستی میں  کام کر رہی ہیں ۔۔۔۔۔۔اس خیرات  پر تشکر  کی جگہ  اسکی  آنکھوں میں نفرت ۔۔۔۔۔۔  اور اس نفرت   کی آگ  میں  دہکتے  انگاروں نے   مجھے  مبہوت  کر دیا ۔۔۔۔مجھے  شش و پنج میں  دیکھ کر وہ   بھوری آنکھوں والا  بچہ بولا ۔  کیا  ہوا  ۔۔۔تم   اپنے سوال  بھول گئے۔  چھوڑو  سوال  مت  کرو   ۔۔۔۔ بھرو  ۔۔۔اپنے کیمرے  میں  ۔۔۔۔میں بولتا ہوں ۔۔۔۔۔ تم لوگ ٹی وی  والے پہلے شور مچاتے ہو ۔۔۔۔کہ یہ دہشت گرد ہیں ان پہ بمباری  کرو ۔۔۔۔ جب  جہاز  بم گراتے  ہیں۔۔۔ ہمارے گھر جلتا ہے ۔۔۔ ہماری ماں  ، بہن بھائی سب  مرتا ہے ۔۔۔ تو پھر  پوچھنے آجاتے ہو  ۔۔۔۔۔ ہمدرد  بن جاتے ہو ۔۔۔۔ آج ہم تم سے  پوچھتا ہے ۔۔۔ بتاو میری ماں دہشت گرد تھی۔۔۔۔ وہ تو کبھی  گھر کی چاردیواری سے بھی باہر نہیں  نکلی ۔۔۔۔کیا میرا بھائی  جسکی عمر صرف  نو سال تھی  وہ بھی دہشت  گرد تھا ۔۔۔۔کیا میرا دادا  ۔۔۔۔جو بیماری  کے ہاتھوں  چارپائی پہ پڑا تھا  ۔۔۔۔، جو ہل بھی نہیں سکتا تھا ۔ جو سہارے کے بغیر   کچھ کھا پی بھی نہیں سکتا تھا   ۔۔۔۔۔ اور وہیں اسی چارپائی  پہ کوئلہ بن گیا ۔۔۔۔کیا  وہ دہشت گرد تھا ؟ ۔۔۔۔یا  ہمارے وہ مویشی  اور  بھیڑ بکریاں  دہشت گرد تھیں ؟    ۔۔۔۔کیا میں  اس ملک سے محبت نہیں کرتا ۔۔۔؟ تم ٹی وی والوں کو  بہت  پتا  ہوتا ہے  بتا و  ۔۔ میرے  پورے خاندان کو  مارنے کے  کتنے ڈالرملے آپ لوگوں کو ۔۔۔؟   جاننا  چاہتے ہو  کہ  میں کیا  بنوں  گا ۔۔۔۔۔۔ شاید  کچھ بھی نہ بن سکوں ۔۔۔لیکن ہم پٹھان ہے ۔۔۔۔۔ہم ایک بات جانتا ہے ۔۔کہ ہم اپنے خاندان کا بدلہ ضرور لے گا  ۔۔۔جب بھی موقعہ ملا ۔۔۔۔۔۔تم  ٹی وی والے بڑے پڑھے لکھے  لوگ ہو ۔۔۔۔بہت جانتے ہو ۔۔۔مجھے صرف ایک سوال  کا جواب  دو۔۔۔۔۔جس امریکہ   کیلئے  آپ لڑ رہے  تھے ۔۔ جس کے  لئے  13 سال  تک آپ نے اپنے  بھائیوں کا خون بہایا ہے ۔۔۔ یہ بتاوکہ جب وہ  امریکہ  ہی جنگ  چھوڑ کے جا رہا  ہے ۔۔۔تو  پاکستانی حکومت کیوں اس جنگ کو  جاری رکھنا چاہتی ہے ؟ ۔۔۔۔۔۔۔یہ سوال پوچھ کر وہ بھوری آنکھوں والا  بچہ  اپنے خیمے کی جانب بڑھ گیا  اور  میری آنکھ کھل گئی ۔۔۔۔۔۔